Make your own free website on Tripod.com
stotra set - 2
hayagriiva
stotram.h
dashaavataara
stotram.h
nyaasa
dashakam.h
sudarshanaa-
shhTakam.h
vairaagya
paJNchakam.h
shrii stutiH
godaa stutiH
raghuviira
gadyam.h

OM
shrii lakshmiinR^isiMha parabrahmaNe namaH |
shrii padmaavatii sameta veN^kaTeshaaya namaH |
shrii vishhNave paramaatmane namaH |
shriimate raamaanujaaya namaH |
shrii nigamaanta mahaa deshikaaya namaH |
shrii saayiraam.h |


vairaagya paJNchakam.h
img

vairaagya paJNchakam.h

shriimaan veN^kaTa naathaaryaH kavitaarkika kesarii |
vedaantaa chaarya varyome sannidhattaaM sadaahR^idi ||
      
      kshoNii koNa shataaMsha paalana kalaa durvaara garvaanala-
      kshubhyatkshudra narendra chaaTu rachanaa dhanyaan.h na manyaamahe |
      devaM sevitumeva nishchinumahe yo.asau dayaaluH puraa
      daanaa mushhTimuche kuchela munaye datte sma vitteshataam.h || 1 ||
      
      silaM kimanalaM bhavedanalamaudaraM baadhituM
      payaH prasR^iti puurakaM kimu na dhaarakaM saarasam.h |
      ayatna mala mallakaM pathi paTachcharaM kachcharaM
      bhajanti vibudhaa mudhaa hyahaha kukshitaH kukshitaH || 2 ||
      
      
      jvalatu jaladhi kroDa kriiDatkR^ipiiDa bhava prabhaa-
      pratibhaTa paTu jvaalaa maalaakulo jaTharaanalaH |
      tR^iNamapi vayaM saayaM saMphulla malli matallikaa
      parimalamuchaa vaachaa yaachaamahe na mahiishvaraan.h || 3 ||
      
      duriishvara dvaara bahirvitardikaa-
      duraasikaayai rachito.ayamaJNjaliH |
      yadaJNjanaabhaM nirapaayamasti me
      dhanaJNjaya syandana bhuushhaNaM dhanam.h || 4 ||
      
      shariira patanaavadhi prabhu nishhevaNaapaadanaat.h
      abindhana dhanaJNjaya prashamadaM dhanaM dandhanam.h |
      dhanaJNjaya vivardhanaM dhanamuduuDha govardhanaM
      susaadhanamabaadhanaM sumanasaaM samaaraadhanam.h || 5 ||
      
      naasti pitraarjitaM kiJNchinna mayaa kiJNchidaarjitam.h |
      asti me hasti shailaagre vastu paitaamahaM dhanam.h || 6 ||
      

* * * * *

kavitaarkikasiMhaaya kalyaaNaguNashaaline .
shriimate veN^kaTeshaaya vedaantagurave namaH ..
* * * * *
img

shrii stutiH
img

shrii stutiH

shriimaan veN^kaTa naathaaryaH kavitaarkika kesarii |
vedaantaa chaarya varyome sannidhattaaM sadaahR^idi ||
      
      
      maanaatiita prathita vibhavaaM maN^galaM maN^galaanaaM
      vakshaH piiThiiM madhu vijayino bhuushhayantiiM svakaantyaa |
      pratyakshaanushravika mahima praarthiniinaaM prajaanaaM
      shreyo muurtiM shriyamasharaNastvaaM sharaNyaaM prapadye || 1 ||
      
      aavirbhaavaH kalasha jaladhaavadhvare vaapi yasyaaH
      sthaanaM yasyaaH sarasija vanaM vishhNu vakshaH sthalaM vaa |
      bhuumaa yasyaa bhuvanamakhilaM devi divyaM padaM vaa
      stoka praGYairanavadhi guNaa stuuyase saa kathaM tvam.h || 2 ||
      
      
      stotavyatvaM dishati bhavatii dehibhiH stuuyamaanaa
      taameva tvaamanitara gatiH stotumaashaMsamaanaH |
      siddhaarambhaH sakala bhuvana shlaaghaniiyo bhaveyaM
      sevaapekshaa tava charaNayoH shreyase kasya na syaat.h || 3 ||
      
      
      yatsaN^kalpaadbhavati kamale yatra dehinyamiishhaaM
      janma sthema pralaya rachanaa jaN^gamaajaN^gamaanaam.h |
      tat.h kalyaaNaM kimapi yaminaamekalakshyaM samaadhau
      puurNaM tejaH sphurati bhavatii paada laakshaa rasaaN^kam.h || 4 ||
      
      nishhpratyuuha praNaya ghaTitaM devi nityaanapaayaM
      vishhNustvaM chetyanavadhiguNaM dvandvamanyonya lakshyam.h |
      sheshhashchittaM vimala manasaaM maulayashcha shrutiinaaM
      saMpadyante viharaNa vidhau yasya shayyaa visheshhaaH || 5 ||
      
      uddeshyatvaM janani bhajatorujjhitopaadhi gandhaM
      pratyagruupe havishhi yuvayoreka sheshhitva yogaat.h |
      padme patyustava cha nigamairnityamanvishhyamaaNo
      naavachchhedaM bhajati mahimaa nartayan.h maanasaM naH || 6 ||
      
      pashyantiishhu shrutishhu paritaH suuri bR^indena saardhaM
      madhye kR^itya triguNa phalakaM nirmita sthaana bhedam.h |
      vishvaadhiisha praNayini sadaa vibhrama dyuuta vR^ittau
      brahmeshaadyaa dadhati yuvayoraksha shaara prachaaram.h || 7 ||
      
      asyeshaanaa tvamasi jagataH saMshrayantii mukundaM
      lakshmiiH padmaa jaladhi tanayaa vishhNu patniindireti |
      yannaamaani shruti paripaNaanyevamaavartayanto
      naavartante durita pavana prerite janma chakre || 8 || 
      
      tvaamevaahuH katichidapare tvatpriyaM lokanaathaM
      kiM tairantaH kalaha malinaiH kiMchiduttiirya magnaiH |
      tvatsaMpriityai viharati harau saMmukhiinaaM shrutiinaaM
      bhaavaaruuDhau bhagavati yuvaaM dampatii daivataM naH || 9 ||
      
      aapannaarti prashamana vidhau baddha diikshasya vishhNoH
      aachakhyustvaaM priya sahachariimaikamatyopapannaam.h |
      praadurbhaavairapi sama tanuH praadhvamanviiyase tvaM
      duurotkshiptairiva madhurataa dugdharaashestaraN^gaiH || 10 ||
      
      dhatte shobhaaM hari marakate taavakii muurtiraadyaa
      tanvii tuN^ga stanabhara nataa tapta jaambuunadaabhaa |
      yasyaaM gachchhantyudaya vilayairnityamaananda sindhau
      ichchhaa vegollasita laharii vibhramaM vyaktayaste || 11 ||
      
      aasaMsaaraM vitatamakhilaM vaaN^mayaM yadvibhuutiH 
      yad bhruu bhaN^gaat.h kusuma dhanushhaH kiN^karo meru dhanvaa |
      yasyaaM nityaM nayana shatakaireka lakshyo mahendraH 
      padme taasaaM pariNatirasau bhaava leshaistvadiiyaiH || 12 ||
      
      agre bhartuH sarasija maye bhadra piiThe nishhaNNaam.h
      ambho raasheradhigata sudhaa saMplavaadutthitaaM tvaam.h |
      pushhpaasaara sthagita bhuvanaiH pushhkalaavartakaadyaiH 
      kL^iptaarambhaaH kanaka kalashairabhyashhiJNchan.h gajendraaH || 13 ||
      
      aalokya tvaamamR^ita sahaje vishhNu vakshaHsthalasthaaM
      shaapaakraantaaH sharaNamagaman.h saavarodhaaH surendraaH |
      labdhvaa bhuuyastribhuvanamidaM lakshitaM tvatkaTaakshaiH 
      sarvaakaara sthira samudayaaM saMpadaM nirvishanti || 14 ||
      
      aarta traaNa vratibhiramR^itaasaara niilaambuvaahaiH
      ambhojaanaamushhasi mishhataamantaraN^gairapaaN^gaiH |
      yasyaaM yasyaaM dishi viharate devi dR^ishhTistvadiiyaa
      tasyaaM tasyaamahamahamikaaM tanvate saMpadoghaaH || 15 ||
      
      yogaarambha tvarita manaso yushhmadaikaantya yuktaM
      dharmaM praaptuM prathamamiha ye dhaarayante dhanaayaam.h |
      teshhaaM bhuumerdhanapati gR^ihaadambaraadambudhervaa
      dhaaraa niryaantyadhikamadhikaM vaaJNchhitaanaaM vasuunaam.h || 16 ||
      
      shreyaskaamaaH kamalanilaye chitramaamnaaya vaachaaM
      chuuDaapiiDaM tava pada yugaM chetasaa dhaarayantaH |
      chhatra chchhaayaa subhaga shirasashchaamara smera paarshvaaH
      shlaaghaashabda shravaNa muditaaH sragviNaH saJNcharanti || 17 ||
      
      UriikartuM kushalamakhilaM jetumaadiinaraatiin.h
      duuriikartuM durita nivahaM tyaktumaadyaamavidyaam.h |
      amba stambaavadhika janana graama siimaanta rekhaam.h
      aalambante vimala manaso vishhNu kaante dayaaM te || 18 ||
      
      jaataakaaN^kshaa janani yuvayoreka sevaadhikaare
      maayaaliiDhaM vibhavamakhilaM manyamaanaastR^iNaaya |
      priityai vishhNostava cha kR^itinaH priitimanto bhajante
      velaabhaN^gaH prashamana phalaM vaidikaM dharmasetum.h || 19 ||
      
      seve devi tridasha mahilaa mauli maalaarchitaM te
      siddhi kshetraM shamita vipadaaM saMpadaaM paada padmam.h |
      yasminniishhannamita shiraso yaapayitvaa shariiraM
      vartishhyante vitamasi pade vaasudevasya dhanyaaH || 20 ||
      
      saanupraasa prakaTita dayaiH saandra vaatsalya digdhaiH
      amba snigdhairamR^ita laharii labdha sabrahmacharyaiH |
      dharme taapa traya virachite gaaDha taptaM kshaNaM maam.h 
      aakiJNchanya glapitamanaghairaardrayethaaH kaTaakshaiH || 21 ||
      
      saMpadyante bhava bhaya tamii bhaanavastvatprasaadaat.h 
      bhaavaaH sarve bhagavati harau bhaktimudvelayantaH |
      yaache kiM tvaamahamiha yataH shiitalodaara shiilaa
      bhuuyo bhuuyo dishasi mahataaM maN^galaanaaM prabandhaan.h || 22 ||
      
      maataa devi tvamasi bhagavaan.h vaasudevaH pitaa me
      jaataH so.ahaM janani yuvayorekalakshyaM dayaayaaH |
      datto yushhmatparijanatayaa deshikairapyatastvaM 
      kiM te bhuuyaH priyamiti kila smera vaktraa vibhaasi || 23 ||
      
      kalyaaNaanaamavikala nidhiH kaa.api kaaruNya siimaa
      nityaamodaa nigama vachasaaM mauli mandaara maalaa |
      saMpad.hdivyaa madhu vijayinaH sannidhattaaM sadaa me
      saishhaa devii sakala bhuvana praarthanaa kaamadhenuH || 24 ||
      
      upachita guru bhakterutthitaM veN^kaTeshaat.h 
      kali kalushha nivR^ittyai kalpamaanaM prajaanaam.h |
      sarasija nilayaayaaH stotrametat.h paThantaH 
      sakala kushala siimaaH saarvabhaumaa bhavanti || 25 ||
      

* * * * *

kavitaarkikasiMhaaya kalyaaNaguNashaaline .
shriimate veN^kaTeshaaya vedaantagurave namaH ..
* * * * *
img

godaa stutiH
img

godaa stutiH

shriimaan veN^kaTa naathaaryaH kavitaarkika kesarii |
vedaantaa chaarya varyome sannidhattaaM sadaahR^idi ||
      
      shriivishhNuchitta kula nandana kalpavalliiM
      shriiraN^garaaja harichandana yoga dR^ishyaam.h |
      saakshaat.h kshamaaM karuNayaa kamalaamivaanyaaM
      godaamananyasharaNaH sharaNaM prapadye || 1 ||
      
      vaideshikaH shruti giraamapi bhuuyasiinaaM
      varNeshhu maati mahimaa na hi maadR^ishaaM te |
      itthaM vidantamapi maaM sahasaiva gode
      mauna druho mukharayanti guNaastvadiiyaaH || 2 ||
      
      tvatpreyasaH shravaNayoramR^itaayamaanaaM
      tulyaaM tvadiiya maNi nuupura shiJNjitaanaam.h |
      gode tvameva janani tvadabhishhTavaarhaaM
      vaachaM prasanna madhuraaM mama saMvidhehi || 3 ||
      
      kR^ishhNaanvayena dadhatiiM yamunaanubhaavaM
      tiirthairyathaavadavagaahya sarasvatiiM te |
      gode vikasvara dhiyaaM bhavatii kaTaakshaat.h 
      vaachaH sphuranti makaranda muchaH kaviinaam.h || 4 ||
      
      asmaadR^ishaamapakR^itau chira diikshitaanaaM
      ahnaaya devi dayate yadasau mukundaH |
      tannishchitaM niyamitastava mauli daamnaa
      tantrii ninaadamadhuraishcha giraaM nigumbhaiH || 5 ||
      
      shoNaa.adhare.api kuchayorapi tuN^gabhadraa
      vaachaaM pravaahanivahe.api sarasvatii tvam.h |
      apraakR^itairapi rasairvirajaa svabhaavaat.h
      godaa.api devi kamiturnanu narmadaa.asi || 6 ||
      
      valmiikataH shravaNato vasudhaatmanaste
      jaato babhuuva sa muniH kavi saarvabhaumaH |
      gode kimadbhutamidaM yadamii svadante
      vaktraaravinda makaranda nibhaaH prabandhaaH || 7 ||
      
      bhoktuM tava priyatamaM bhavatiiva gode
      bhaktiM nijaaM praNaya bhaavanayaa gR^iNantaH |
      uchchaavachairviraha saMgamajairudantaiH
      shR^iN^gaarayanti hR^idayaM guravastvadiiyaaH || 8 ||
      
      maataH samutthitavatiimadhi vishhNuchittaM
      vishvopajiivyamamR^itaM vachasaa duhaanaam.h |
      taapachchhidaM hima rucheriva muurtimanyaaM
      santaH payodhi duhituH sahajaaM vidustvaam.h || 9 ||
      
      taatastu te madhubhidaH stuti lesha vashyaat.h 
      karNaamR^itaiH stuti shatairanavaapta puurvam.h |
      tvanmauli gandha subhagaamupahR^itya maalaaM
      lebhe mahattara padaanuguNaM prasaadam.h || 10 ||
      
      dik.h dakshiNaa.api pari paktrima puNya labhyaat.h
      sarvottaraa bhavati devi tavaavataaraat.h |
      yatraiva raN^gapatinaa bahumaana puurvaM
      nidraalunaapi niyataM nihitaaH kaTaakshaaH || 11 ||
      
      praayeNa devi bhavatii vyapadesha yogaat.h
      godaavarii jagadidaM payasaa puniite |
      yasyaaM sametya samayeshhu chiraM nivaasaat.h
      bhaagiirathii prabhR^itayo.api bhavanti puNyaaH || 12 ||
      
      naage shayaH sutanu pakshirathaH kathaM te
      jaataH svayaMvara patiH purushhaH puraaNaH |
      evaM vidhaaH samuchitaM praNayaM bhavatyaaH
      saMdarshayanti parihaasa giraH sakhiinaam.h || 13 ||
      
      tvadbhukta maalya surabhiikR^ita chaaru mauleH
      hitvaa bhujaantara gataamapi vaijayantiim.h |
      patyustaveshvari mithaH pratighaata lolaaH
      barhaatapatra ruchimaarachayanti bhR^iN^gaaH || 14 ||
      
      aamodavatyapi sadaa hR^idayaM gamaa.api
      raagaanvitaa.api lalitaa.api guNottaraa.api |
      mauli srajaa tava mukunda kiriiTa bhaajaa
      gode bhavatyadharitaa khalu vaijayantii || 15 ||
      
      tvanmauli daamani vibhoH shirasaa gR^ihiite
      svachchhanda kalpita sapiiti rasa pramodaaH |
      maJNju svanaa madhu liho vidadhuH svayaM te
      svaayaMvaraM kamapi maN^gala tuurya ghoshham.h || 16 ||
      
      vishvaayamaana rajasaa kamalena naabhau
      vakshaHsthale cha kamalaa stana chandanena |
      aamodito.api nigamairvibhuraN^ghri yugme
      dhatte natena shirasaa tava mauli maalaam.h || 17 ||
      
      chuuDaa padena parigR^ihya tavottariiyaM
      maalaamapi tvadalakairadhivaasya dattaam.h |
      praayeNa raN^gapatireshha bibharti gode
      saubhaagya saMpadabhishheka mahaadhikaaram.h || 18 ||
      
      tuN^gairakR^itrima giraH svayamuttamaaN^gaiH
      yaM sarvagandha iti saadaramudvahanti |
      aamodamanyamadhigachchhati maalikaabhiH
      so.api tvadiiya kuTilaalaka vaasitaabhiH || 19 ||
      
      dhanye samasta jagataaM pituruttamaaN^ge
      tvanmaulimaalya bhara saMbharaNena bhuuyaH |
      indiivara srajamivaadadhati tvadiiyaani
      aakekaraaNi bahumaana vilokitaani || 20 ||
      
      raN^geshvarasya tava cha praNayaanubandhaat.h
      anyonya maalya parivR^ittimabhishhTuvantaH |
      vaachaalayanti vasudhe rasikaastrilokiiM 
      nyuunaadhikatva samataa vishhayairvivaadaiH || 21 || 
      
      duurvaa dala pratimayaa tava deha kaantyaa
      gorochanaa ruchirayaa cha ruchendiraayaaH |
      aasiidanujjhita shikhaavala kaNTha shobhaM
      maaN^galyadaM praNamataaM madhuvairi gaatram.h || 22 ||
      
      archyaM samarchya niyamairnigama prasuunaiH
      naathaM tvayaa kamalayaa cha sameyivaaMsam.h |
      maatashchiraM niravishan.h nijamaadhiraajyaM
      maanyaa manu prabhR^itayo.api mahiikshitaste || 23 ||
      
      aardraaparaadhini jane.apyabhirakshaNaarthaM
      raN^geshvarasya ramayaa vinivedyamaane |
      paarshve paratra bhavatii yadi tatra naasiit.h
      praayeNa devi vadanaM parivartitaM syaat.h || 24 ||
      
      gode guNairapanayan.h praNataaparaadhaan.h
      bhruukshepa eva tava bhoga rasaanukuulaH |
      karmaanubandhi phala daana ratasya bhartuH
      svaatantrya durvyasana marma bhidaa nidaanam.h || 25 ||
      
      raN^ge taTidguNavato ramayaiva gode
      kR^ishhNaambudasya ghaTitaaM kR^ipayaa suvR^ishhTyaa |
      daurgatya durvishha vinaasha sudhaa nadiiM tvaaM
      santaHprapadya shamayantyachireNa taapaan.h || 26 ||
      
      jaataaparaadhamapi maamanukampya gode
      goptrii yadi tvamasi yuktamidaM bhavatyaaH |
      vaatsalya nirbharatayaa jananii kumaaraM
      stanyena vardhayati dashhTa payodharaa.api || 27 ||
      
      shatamakha maNi niilaa chaaru kalhaara hastaa
      stana bhara namitaaN^gii saandra vaatsalya sindhuH |
      alaka vinihitaabhiH sragbhiraakR^ishhTa naathaa
      vilasatu hR^idi godaa vishhNuchittaatmajaa naH || 28 ||
      
      iti vikasita bhakterutthitaaM veN^kaTeshaat.h
      bahuguNa ramaNiiyaaM vakti godaastutiM yaH |
      sa bhavati bahumaanyaH shriimato raN^gabhartuH
      charaNa kamala sevaaM shaashvatiimabhyupaishhyan.h || 29 ||
      

* * * * *

kavitaarkikasiMhaaya kalyaaNaguNashaaline .
shriimate veN^kaTeshaaya vedaantagurave namaH ..
* * * * *
img

raghuviira gadyam
img

raghuviira gadyam

shriimaan veN^kaTa naathaaryaH kavitaarkika kesarii |
vedaantaa chaarya varyome sannidhattaaM sadaahR^idi ||
      
      jayatyaashrita saMtraasa dhvaanta vidhvaMsanodayaH |
      prabhaavaan.h siitayaa devyaa parama-vyoma bhaaskaraH ||
      
      jaya jaya mahaaviira ! 
      mahaadhiira dhaureya ! 
      devaasura samara samaya samudita nikhila nirjara nirdhaarita 
           niravadhikamaahaatmya ! 
      dashavadana damita daivata parishhadabhyarthita daasharathi-bhaava !
      dinakara kula kamala divaakara !
      divishhadadhipati raNa sahacharaNa chatura dasharatha charama-R^iNa 
           vimochana !
      kosala-sutaa kumaara-bhaava kaJNchukita kaaraNaakaara !
      kaumaara keli gopaayita kaushikaadhvara !
      raNaadhvara dhurya bhavya divyaastra bR^inda vandita ! 
      praNata jana vimata vimathana durlalitadorlalita ! 
      tanutara vishikha vitaaDana vighaTita visharaaru sharaaru 
           taaTakaa taaTakeya ! 
      jaDa-kiraNa shakala-dharajaTila naTa pati-makuTa naTana-paTu 
           vibudha-sarid.h-ati-bahula madhu-galana lalita-pada 
           nalina-raja-upa-mR^idita nija-vR^ijina jahadupala-tanu-ruchira 
           parama-muni vara-yuvati nuta ! 
      kushika-sutakathita vidita nava vividha katha ! 
      maithila nagara sulochanaa lochana chakora chandra ! 
      khaNDa-parashu kodaNDa prakaaNDa khaNDana shauNDa bhuja-daNDa ! 
      chaNDa-kara kiraNa-maNDala bodhita puNDariika vana ruchi luNTaaka lochana ! 
      mochita janaka hR^idaya shaN^kaataN^ka !
      parihR^ita nikhila narapati varaNa janaka-duhita kucha-taTa viharaNa 
           samuchita karatala !
      shatakoTi shataguNa kaThina parashu dhara munivara kara dhR^ita 
           duravanama-tama-nija dhanuraakarshhaNa prakaashita paarameshhThya ! 
      kratu-hara shikhari kantuka vihR^itimukha jagadaruntuda 
           jitaharidanta-danturodanta dasha-vadana damana kushala dasha-shata-bhuja 
           nR^ipati-kula-rudhirajhara bharita pR^ithutara taTaaka tarpita 
           pitR^ika bhR^igu-pati sugati-vihati kara nata paruDishhu parigha !
      anR^ita bhaya mushhita hR^idaya pitR^i vachana paalana pratiGYaavaGYaata 
           yauvaraajya !
      nishhaada raaja sauhR^ida suuchita saushiilya saagara !
      bharadvaaja shaasanaparigR^ihiita vichitra chitrakuuTa giri kaTaka 
           taTa ramyaavasatha !
      ananya shaasaniiya !
      praNata bharata makuTataTa sughaTita paadukaagryaabhishheka nirvartita 
           sarvaloka yogakshema !
      pishita ruchi vihita durita vala-mathana tanaya balibhuganu-gati sarabhasashayana tR^iNa 
           shakala paripatana bhaya chakita sakala suramuni-vara-bahumata mahaastra saamarthya !
      druhiNa hara vala-mathana duraalakshya shara lakshya !
      daNDakaa tapovana jaN^gama paarijaata !
      viraadha hariNa shaarduula !
      vilulita bahuphala makha kalama rajani-chara mR^iga mR^igayaarambha 
           saMbhR^itachiirabhR^idanurodha !
      trishiraH shirastritaya timira niraasa vaasara-kara !
      duushhaNa jalanidhi shoshaaNa toshhita R^ishhi-gaNa ghoshhita vijaya ghoshhaNa !
      kharatara khara taru khaNDana chaNDa pavana !
      dvisapta rakshaH-sahasra nala-vana vilolana mahaa-kalabha !
      asahaaya shuura !
      anapaaya saahasa !
      mahita mahaa-mR^itha darshana mudita maithilii dR^iDha-tara parirambhaNa 
           vibhavaviropita vikaTa viiravraNa !
      maariicha maayaa mR^iga charma parikarmita nirbhara darbhaastaraNa !
      vikrama yasho laabha vikriita jiivita gR^ighra-raajadeha didhakshaa 
           lakshita-bhakta-jana daakshiNya !
      kalpita vibudha-bhaava kabandhaabhinandita !
      avandhya mahima munijana bhajana mushhita hR^idaya kalushha shabarii 
           mokshasaakshibhuuta !
      prabhaJNjana-tanaya bhaavuka bhaashhita raJNjita hR^idaya !
      taraNi-suta sharaNaagatiparatantriikR^ita svaatantrya !
      dR^iDha ghaTita kailaasa koTi vikaTa dundubhi kaN^kaala kuuTa duura vikshepa 
           daksha-dakshiNetara paadaaN^gushhTha dara chalana vishvasta suhR^idaashaya !
      atipR^ithula bahu viTapi giri dharaNi vivara yugapadudaya vivR^ita chitrapuN^ga vaichitrya !
      vipula bhuja shaila muula nibiDa nipiiDita raavaNa raNaraNaka janaka chaturudadhi 
           viharaNa chatura kapi-kula pati hR^idaya vishaala shilaatala-daaraNa daaruNa shiliimukha !
      apaara paaraavaara parikhaa parivR^ita parapura parisR^ita dava dahana 
           javana-pavana-bhava kapivara parishhvaN^ga bhaavita sarvasva daana !
      ahita sahodara rakshaH parigraha visaMvaadivividha sachiva vipralambha samaya 
           saMrambha samujjR^imbhita sarveshvara bhaava !
      sakR^itprapanna jana saMrakshaNa diikshita !
      viira !
      satyavrata !
      pratishayana bhuumikaa bhuushhita payodhi pulina !
      pralaya shikhi parushha vishikha shikhaa shoshhitaakuupaara vaari puura !
      prabala ripu kalaha kutuka chaTula kapi-kula kara-talatulita hR^ita girinikara saadhita 
           setu-padha siimaa siimantita samudra !
      druta gati taru mR^iga varuuthinii niruddha laN^kaavarodha vepathu laasya liilopadesha 
           deshika dhanurjyaaghoshha !
      gagana-chara kanaka-giri garima-dhara nigama-maya nija-garuDa garudanila lava galita 
           vishha-vadana shara kadana !
      akR^ita chara vanachara raNa karaNa vailakshya kuuNitaaksha bahuvidha raksho 
           balaadhyaksha vakshaH kavaaTa paaTana paTima saaTopa kopaavalepa !
      kaTuraTad.h aTani TaN^kR^iti chaTula kaThora kaarmuka !
      vishaN^kaTa vishikha vitaaDana vighaTita makuTa vihvala vishravastanayavishrama 
           samaya vishraaNana vikhyaata vikrama !
      kumbhakarNa kula giri vidalana dambholi bhuuta niHshaN^ka kaN^kapatra !
      abhicharaNa hutavaha paricharaNa vighaTana sarabhasa paripatad.h aparimitakapibala 
           jaladhilahari kalakala-rava kupita maghava-jidabhihanana-kR^idanuja saakshika 
           raakshasa dvandva-yuddha !
      apratidvandva paurushha !
      tra yambaka samadhika ghoraastraaDambara !
      saarathi hR^ita ratha satrapa shaatrava satyaapita prataapa !
      shitasharakR^italavanadashamukha mukha dashaka nipatana punarudaya daragalita janita 
           dara tarala hari-haya nayana nalina-vana ruchi-khachita nipatita sura-taru kusuma vitati 
           surabhita ratha patha !
      akhila jagadadhika bhuja bala vara bala dasha-lapana lapana dashaka lavana-janita kadana 
           paravasha rajani-chara yuvati vilapana vachana samavishhaya nigama shikhara nikara 
           mukhara mukha muni-vara paripaNita!
      abhigata shatamakha hutavaha pitR^ipati nirR^iti varuNa pavana dhanadagirishapramukha 
           surapati nuti mudita !
      amita mati vidhi vidita kathita nija vibhava jaladhi pR^ishhata lava !
      vigata bhaya vibudha vibodhita viira shayana shaayita vaanara pR^itanaugha !
      sva samaya vighaTita sughaTita sahR^idaya sahadharmachaariNiika !
      vibhiishhaNa vashaMvadii-kR^ita laN^kaishvarya !
      nishhpanna kR^itya !
      kha pushhpita ripu paksha !
      pushhpaka rabhasa gati goshhpadii-kR^ita gaganaarNava !
      pratiGYaarNava taraNa kR^ita kshaNa bharata manoratha saMhita siMhaasanaadhiruuDha !
      svaamin.h !
      raaghava siMha !
      haaTaka giri kaTaka laDaha paada piiTha nikaTa taTa pariluThita nikhilanR^ipati kiriiTa 
           koTi vividha maNi gaNa kiraNa nikara niiraajitacharaNa raajiiva !
      divya bhaumaayodhyaadhidaivata !
      pitR^i vadha kupita parashu-dhara muni vihita nR^ipa hanana kadana puurvakaalaprabhava 
           shata guNa pratishhThaapita dhaarmika raaja vaMsha !
      shucha charita rata bharata kharvita garva gandharva yuutha giita vijaya gaathaashata !
      shaasita madhu-suta shatrughna sevita !
      kusha lava parigR^ihiita kula gaathaa visheshha !
      vidhi vasha pariNamadamara bhaNiti kavivara rachita nija charitanibandhana nishamana 
           nirvR^ita !
      sarva jana sammaanita !
      punarupasthaapita vimaana vara vishraaNana priiNita vaishravaNa vishraavita yashaH 
           prapaJNcha !
      paJNchataapanna munikumaara saJNjiivanaamR^ita !
      tretaayuga pravartita kaartayuga vR^ittaanta !
      avikala bahusuvarNa haya-makha sahasra nirvahaNa nirva rtita nijavarNaashrama dharma !
      sarva karma samaaraadhya !
      sanaatana dharma !
      saaketa janapada jani dhanika jaN^gama taditara jantu jaata divya gati daana darshita nitya
           nissiima vaibhava !
      bhava tapana taapita bhaktajana bhadraaraama !
      shrii raamabhadra !
      namaste punaste namaH ||
      
      chaturmukheshvaramukhaiH putra pautraadi shaaline |
      namaH siitaa sametaaya raamaaya gR^ihamedhine ||
      
      kavikathaka siMhakathitaM
      kaThota sukumaara gumbha gambhiiram.h |
      bhava bhaya bheshhajametat.h
      paThata mahaaviira vaibhavaM sudhiyaH ||
      

* * * * *

kavitaarkikasiMhaaya kalyaaNaguNashaaline .
shriimate veN^kaTeshaaya vedaantagurave namaH ..
* * * * *
img

hayagriiva
stotram.h
dashaavataara
stotram.h
nyaasa
dashakam.h
sudarshanaa-
shhTakam.h
vairaagya
paJNchakam.h
shrii stutiH
godaa stutiH
raghuviira
gadyam.h








    These pages are maintained
    as a small step in fostering
    sanaatana saampradaayam.

    ITRANS transliteration scheme has been generally followed for all Sanskrit words written in Roman script, and adapted where appropriate, for easy reading.


    These pages do not represent the official views of
    any group or organization.

    img and img Netscape

    TRIPOD
    Get your own Free Home Page

    img Go To: stotraas list